काठमाडौं, पुस २६ ।

पूर्वराजा ज्ञानेन्द्र शाह भोलि भारत जान लागेको समाचार बाहिर आएको छ । उनी भारतको जोधपुरमा आयोजना हुने बैबाहिक समारोहमा भाग लिन बुधबार त्यता जान लागेका हुन् । उनले भारतमा रहँदा दिल्ली पुगेर उच्च राजनैतिक भेटवार्ता गर्ने बताइएको छ ।

त्यस्तै बैबाहिक समारोहमा भाग लिन हाल सिंगापूरमा रहेकी पूर्वरानी कोमल शाह पनि भारत आउन लागेको बताइएको छ । बैबाहिक समारोहमा पूर्वराजा रानी सहित पूर्व राजपरिवारका सदस्यहरु पनि भारत जाने जनाइएको छ ।

त्यस्तै यतिबेला पूर्वप्रधानमन्त्री सूर्यबहादुर थापा सहित राजनैतिक दलका नेताहरु दिल्लीतिरै रहेका छन् ।

यस्तै पूर्वराजको सम्पत्तिबाट नेपाल ट्रष्टको कार्यालयले वार्षिक २ करोड ८७ लाख ८४ हजार रुपैयाँ उठाउदै आएको तथ्य बाहिर आएको छ । सरकारले ट्रष्टको कार्यालय मार्फत वार्षिक रुपमा पूर्वराज परिवारको सम्पत्ति भाडा र भाडा रकमको ब्याजबाट सो रकम उठाउदै आएको तथ्य खुलेको हो । ट्रष्टले पूर्वराज परिवारको काठमाडौंमा रहेको विभिन्न मल र भवनको भाडाबाट यो रकम उठाउँदै आएको हो ।