शनिबार, १ मंसिर, २०७५ (Sat, 17 November, 2018)
भेटवार्ता
Feb 28, 2016
रामचन्द्र जीसँग भिजन छ, एक पटक सभापति दियो भने देशभर कांग्रेस जाग्छ
आईतवार, फागुन १६, २०७२

विष्णु धिताल राजनीति र ब्यवसायमा उतिकै क्रियाशिल ब्यक्ति हुन् । लमजुङमा जन्मिएका धिताल नेपालको सफा सवारी ब्यवसायीका अध्यक्ष समेत हुन् । त्यत्ति मात्र नभई वित्तिय र बैंकिङ्ग क्षेत्रमा समेत स्थापित छन् । २०४० सालबाट नेपाली कांग्रेसको भातृ संगठन नेविसंघबाट राजनीतिक जीवनको प्रारम्भ गरेका धिताल नेविसंघको केन्द्रिय सचिवदेखि तरुण दलको केन्द्रिय सदस्य हुँदै दुई कार्यकाल लमजुङ कांग्रेसको क्षेत्रिय सभापति समेत भैसकेका छन् । अहिले ती नै कांग्रेसका नेता धिताल युवा र आर्थिक एजेण्डालाई जोड दिँदै नेपाली कांग्रेसको आसन्न १३ औं महाधिवेशनमा केन्द्रिय सदस्यमा उमेद्वारी दिदै छन् । प्रस्तुत छ, आसन्न महाधिवेशन र उमेद्वारीको विषयमा केन्द्रित रहेर गरिएको कुराकानीको केही अंश :

– तपाइको उम्मेद्वारी किन ?

नेपाली कांग्रेसलाई बलियो र सुदृढ बनाएर पार्टीमा नयाँ आयाम थप्न मेरो उमेद्वारी हो । वीपीको विचारलाई थप विकास गर्दै मुुलकको अर्थतन्त्रलाई उन्नत र सुदृढ बनाउनु पर्छ भन्ने मेरो मान्यता हो । युवालाई स्थानीय तह र गाउँमै कृषि र पशुपालनमा आकर्षित गरेर रोजगारी सृजना गर्नुपर्छ । ब्यवसायिक खेती प्रणालीको विकास गर्नुपर्छ ।

र, जनताको जीवनस्तर उकास्नु पर्छ र मुलुकको अर्थतन्त्रलाई सुदृढ बनाउनु पर्छ । अर्थतन्त्रमा सक्षम भयो भने मात्र हामीले विचारको विकास गर्न सक्छौं र युवालाई कांग्रेसमा आकर्षित गर्न सक्छौं । अनि मात्र वीपीको विचारलाई यर्थाथमा चरितार्थ गर्न सकिन्छ । म सँग त्यही दृष्टिकोण छ । जहिले पनि राजनीतिलाई मात्र प्राथमिकतामा राख्नु हुँदैन । अव मुलुकलाई समुन्नत र समृद्ध बनाउने खाका कोर्ने बेला आयो र त्यसको लागि मसंग प्रष्ट एजेण्डा छ ।

– तर, अहिले रोजगारीकै खोजीमा युवाको ठूलो संख्या विदेश पलाएन भैरहेको छ । यसलाई रोक्ने योजना चाँही के छ ?

हो, हाम्रा युवाले खाडीमा खुनपसिना बगाई रहेका छन् । उनीहरुलाई आर्थिक उपार्जन र आत्मसम्मानको साथ गाउँमै बस्ने वातावरण बनाउनु पर्छ । गाउँमै निजी विद्यालय सरह स्तरिय पढाईको ब्यवस्था गरिदिनु पर्छ । कृषि उत्पादन र पर्यटन प्रबद्र्धन गर्न होमस्टेको विकास गर्न सकिन्छ । गाउँमै रोजगारीको अवसर भयो भने को विदेश जान्छ ? हो, त्यसैले अहिले मेरो गाउँ केन्द्रित र युवा केन्द्रित विकासको योजना छ । दोस्रो, म नेपाली कांग्रेसमा तीन दशक भन्दा बढी काम गरिरहेको पार्टीको बफादार सिपाई हुँ ।

नेविसंघदेखि तरुण दलको क्षेत्रीय सभापतिसम्मको महत्वपूर्ण पदमा रहेर जिम्मेवारी पूर्वक भूमिका निर्वाह गरेका छु । मैले कहिले पदको लोभ गरिन । अहिले पनि जिल्ला सभापति दिए, मैले लिइन । अब, म नयाँ परिवेश अनुसार पार्टी र मुलकलाई हाँक्न गण्डक क्षेत्रको विकासका लागि मैलै उमेद्वारी दिएका हुँ । गण्डक क्षेत्रमा हाइड्रोका ठूलो सम्भाबना छ । मैले त्यो गरेरै छाड्छु । म विचार नेतृत्व क्षमताले पनि खारिएको मान्छे हुँ । आर्थिक रुपमा मुलुक सम्पन्न भयो भने मात्र कांग्रेसले अब बिसौं वर्षसम्म राजनीति गर्न सक्छ ।

त्यसको नेतृत्व अब म गर्न चाहन्छु । अब, त्याग जेलनेलको खोक्रा भाषण चुटेर मात्र हुँदैन । अब तीस वर्ष जेलमा बसेको मान्छेले आएर मुलुकलाई समृद्ध पार्न सक्दैन उहाँहरुलाई सम्मान गर्नु पर्छ । तर, अब शीर्ष नेताहरुको विचारलाई अघि बढाउँदै युवालाई समेटेर पार्टी र देश बनाउनु पर्छ भन्ने मेरा मान्यता हो । टिके प्रथा र नातावाद कृपावादमा लाग्यौं । यसले लोकतान्त्रीक परिपाटीलाई विकास गर्न सकेन । लोकतन्त्रको गहना भनेको नै निर्वाचन हो ।

अब, तत्काल सबै भातृ संगठनको निर्वाचन हुनुपर्छ र नयाँ नेतृत्व छान्नु पर्छ । पार्टीको १३ औं महाधिवेशनबाट पनि अव मुलुकलाई हाक्ने र कांग्रेसको आर्थिक नीति लागु गर्न सक्षम नेतृत्व छान्नु पर्छ । नेताहरुको घरमा विहान वेलुका धाउने होइन । टोपी घेरो र चोली फाटेका जनताको बस्तीबस्तीमा पुग्ने नेतृत्व छान्नुपर्छ ।

– नेपाली कांग्रेसमा नीति भन्दा पनि नेता प्रधान हुँदै गयो भन्छ नि ? वास्तविकता के हो ?

यी दुई एक अर्काका पुरक हुन् । नेतृत्वले नीति बनाउँछ । फेरी नेतृत्वले नै त्यो नीतिलाई कार्यन्वयन गर्छ । तर, पनि नेपाली कांग्रेसमा निती प्रधान छैन् । अमेरीकामा बाराक ओवामा नीति कै कारण दूई पटक नेतृत्वमा आए । आज शेरवहादुर देउवाले पनि मेरो नीति यो हो भनेर छलफल र बहस चलाएको भए राम्रो हुन्थ्यो । त्यसले विचारको बहस गराउथ्यो । तर, उहाँको कुनै नीति सर्वजनिक भएको छैन् । उल्टै रामचन्द्र पौडेलले प्रशिक्षणमार्फत भएपनि आफ्नो नीति र कार्यक्रमको बारेमा कार्यकर्ता समक्ष आफ्नो विचार राख्नु भएको छ ।

– यो कांग्रेसको १३ औं महाधिवेशन भन्दा पनि १३औं समभापति चयन जस्तो देखियो नि ? वीपिको आर्दश हराएकै हो ?

यो १३ औं महाधिवेशनमार्फत १३ औं सभापति चयन हो । प्रत्येक चार चार वर्षको अन्तरालमा हुने निर्वाचन र नेतृत्व चयन प्रक्रिया हो । निर्वाचनले नयाँ जनादेश पनि दिन्छ, नेतृत्व पनि चयन गर्छ । तर, यो १३ औं महाधिवेशन नेतृत्व चयनका लागि मात्र हैन आर्थिक र राजनीतिक रुपले मुलुकलाई दिशानिर्देश गर्ने महाधिवेशन हुनु पर्छ ।

– युवा पुस्ता र पाका पुस्ता सबैलाई समेटेर जानुपर्छ भन्नेमा यहाँको जोड छ ? ठोस अवधारणा तपाईसँग के छ ?

यसका लागि मैले धेरै तयारी गरेको छु । मेरो ब्यवसाय विद्युतिय सवारी हो । हिजो एउटा गाडीबाट सुरु भएको व्यवसायमा अहिले सात सय गाडी सञ्चालनमा छन् । म त्यसको अध्यक्ष पनि हुँ । आज मैले आफ्नो गुजारा चलाउन पुग्ने आम्दानी गरिरहेको छु । त्यो कुनै भ्रष्टाचार, ठगी गरेर कमाएको हैन । म आज वित्तिय क्षेत्रको पनि महत्वपूर्ण ठाउँमा पुगेको छु । कुनै बैंकको अध्यक्ष पनि छु । त्यो कतैबाट कमाएर मन्त्री पद खाएर भ्रष्टाचार गरेर ल्याएको हैन ।

दुःखले कमाएको हुँ । हो, आर्थिक रुपमा कसरी समृद्ध हुने भन्ने भिजन म सँग छ । युवालाई रोजगारी दिने, पछाडि परेका दलित, महिला मधेशी मुस्लिम समुदायलाई निशुल्क स्वास्थ्य, शिक्षा दिने । उच्च जाति ब्राम्हण क्षेत्रीलाई पनि आरक्षणको उचित प्रबन्ध मिलाउने, गाउँका युवालाई गाउँमा नै रोजगारीको अवसर प्रदान गर्ने कृषकलाई उन्नत र ब्यवसायिक खेतीको लागि अनुदानको ब्यवस्था गर्ने । माछा खुवाउने मात्र हैन माछा मार्न सिकाउनु प¥यो, म त्यो काम गरेरै छाड्छु ।

– तपाईले आर्थिक एजेण्डालाई बढि प्राथमिकता जोड दिनुभएको छ, कांग्रेस त मास पोल्टिक्स गर्ने पार्टी हो भन्छ नि ?

यसले के प्रभाव पार्ला र ? पुरानो सोचले अब केहि चल्दैन । विश्व सानो घेरा जस्तै भैसक्यो । नयाँ युग आईसक्यो । विद्धानहरु धेरै आईसके । त्याग तपस्या पनि एउटा पाटो हो । तर, अब शिक्षित र क्षमतावान ब्यक्तिलाई अघि बढाएर आर्थिक एजेण्डालाई नै मुख्य आधार बनाएर अघि बढ्नु पर्छ । मुलक भूकम्प र नाकाबन्दीले थिलथिलो भएको छ । त्यसलाई पुनःनिर्माण गर्नु प¥यो । मुलक भत्ताले हैन आर्थिक कार्यक्रमले चल्नु पर्छ । मुलुकको अर्थतन्त्र तहसनहस भैसक्यो । जस्ले अर्थतन्त्र माथि उठाउने एजेण्ड ल्याउदैन त्यसलाई नेतृत्वमा ल्याउनु गंभिर भुल हुनेछ । कांग्रेसको नेतृत्वमा मुलुकको आर्थिक कायापलट गर्नुपर्छ ।

– तपाई पर्यटकीय जिल्ला लमजुङको त्यसमा पनि ऊर्जाको जिल्लाको रुप परिचित जिल्लाको मान्छे यति लामो समयसम्म लमजुङमा राजनीति गरेर के गर्नु भयो ?

साच्चै भन्ने हो भने अवस्था विडम्बनापूर्ण छ । म ठूलो पार्टीको जिल्ला सभापति । हाम्रो प्रवृति सत्तामुखी छ । पावरमा जो प्रधानमन्त्री, मन्त्री छ, जो जिल्लाको हर्ताकर्ता छ, सबै उसैले ह्याण्डल गर्छ । दोस्रो जिल्ला विकास समितिमा सभापति छैन । सीडीयोले जिल्ला चालउनु पर्ने विडम्बना छ । जनप्रतिनिधि छैन् । गाउँको विकास धेरै तल्लोस्तरमा छ । त्यही विकासको नेतृत्व गर्न, पार्टी आन्तरिक र स्थानीय निकायको निर्वाचन समयमै हुनुपर्छ ।

– ब्यक्तिगत पहलमा जिल्लामा के के विकासको काम भए ? र के त्यस्तो योजना लैजादै हुनुहुन्छ ?

मैले ब्यक्तिगत रुपमा मेरो बुताले भ्याएसम्म काम गरेका छु । केही ठाउँमा माछा पालनको ब्यवस्था गरिदिएको छु । केही ठाउँमा ब्यवसायिक बाख्रा पालनको पनि प्रबन्ध मिलाई दिएको छु । विभिन्न विद्यालका भौतिक पूर्वधार निमार्णमा पनि मैले पहल गरेको छु । तर, विकास ब्यक्तिगत पहलमा हैन राज्यको नीति भित्र पर्नुपर्छ । एउटा ब्यक्तिले गरेर हुँदैन् । राज्यको संयन्त्र बलियो बनाउनु पर्छ । हरेक उद्योग गर्छु भन्ने किसानलाई गाई पालन माच्छा पालन उन्नख खेती गर्नका लागि कम्तीमा पनि दुई लाख रुपैयाँ लोन दिने ब्यवस्था गर्नुपर्छ । यस्ता सामान्य नीति पनि हामीसँग छैन् । अनि कसरी बन्छ मुलुक ? राज्यबाटै नीति बनाएपछि मात्र मुलुकले आर्थिक रुपमा गति लिन्छ । ब्यक्तिगत पहल त गौण हुन् ।

– तपाईले युवाको प्रतिनिधित्वको विषयलाई जोड दिनु भएको छ, यो त कृष्ण सिटौलाले नै उठाउनु भएको छ नी हैन र ? तपाई किन समेटिन सक्नु भएन ?

उहाँले अहिले युवा नेतृत्वको कुरा गर्नु भएको छ । आन्दोलनको पनि नेतृत्व गर्नु भएको छ । माओवादीलाई पनि जङ्गलबाट सहरमा ल्याउन ठुलो भुमिका खेल्नु भयो । उहाँ स्वतन्त्र मान्छे हो । उहाँलाई म आफ्नो ठाउँबाट धेरै सम्मान गर्छु, त्यता तर्फ टिकाटिप्पणी नगरौं ।

– उहाँले त युवाको तर्फबाट छुट्टै प्यानल नै बनाउने प्रयास गरिहरनु भएको छ नि ? यसमा तपाईको धारणा ?

यो कुरामा म नेपाली कांग्रेसको दुई वटा धार देख्छु । एउटा शेरबहादुर देउवा अर्को रामचन्द्र पौडेल । अन्य धार भनेको त्यही भित्रको प्रतिस्पर्धा मात्रै हो । केन्द्रमा आएपछि यस्तो प्रतिस्पर्धा स्वभाविक नै हो ।

– उसो भए संस्थापनको नेतृत्व रामचन्द्र पौडेलकी कृष्णप्रसाद सिटौला त ?
 
त्यो त स्वतःसिद्ध छ । नेतृत्व जोसँग छ उही हो संस्थापन । अहिले कार्यवाहक सभापति रामचन्द्र पौडेल हुनुहुन्छ । उहाँ नै संस्थापन हो । धेरै बोल्नै पर्दैन ।

शशांक जीले भन्नु भए जस्तै मैलै कुनै पनि पद नथपी सवैलाई समेटर लान्छु भन्नु भएको छ रामचन्द्र पौडेलले । उहाँले तपाईहरु मिलाउनुस मलाई बाहिर राखे पनि शेखरजी, सुजताजी, प्रकाशमानजी, रामशरण महत, कृष्ण सिटौला बस्नुस र निर्णय गर्नुस म मान्न तयार छु भन्नु भएको छ । उहाँले मलाई नै सभापति चाहियो नै भन्नु भएको छैन् । म बाहिर बस्न पनि तयार छु भन्नु भएको छ । अव रामचन्द्र जीले यति भनेपछि त सवैलाई मान्ने हुने निर्णय गर्न सक्नु प¥र्यो उहाँहरुले – शशांक, सुजता, प्रकाशमान, कृष्ण सिटौलाले ) त्यसैले रामचन्द्र पौडेल सवैलाई स्वीकार्य नेता हुनुहुन्छ ।

– अव पाँच जनाले निर्णय गर्नु प¥यो नि, कसलाई सभापनि बनाउने भनेर ? माथिल्लो नेता विभाजित भएपनि तपाईहरुले युवा पुस्तालाई एक बनाएर लान सक्नु हुन्छ त ?

यो प्रतिस्पर्धाको युग हो । देशभरका युवा एक हुने संभावना छैन । हामी प्रजातान्त्रिक हौं । महाधिवेशन न्यायाधिश हो । त्यसैले फैसला गरेर क्षमतावान युवालाई नेतृत्वमा लान्छ । को सँग के क्षमता छ त्यो महाधिवेशनले छान्छ । कांग्रेसले यो कार्यकर्ताको अधिकारलाई बञ्चित गर्दैन । कांग्रेस भनेको नै निर्वाचनको पर्याय हो । लोकतन्त्रको मसिहा नै कांग्रेस हो । निर्वाचनदेखि डढाएर हुँदैन । आन्तरिक प्रतिस्पर्धालाई स्वस्थ र निश्पक्ष बनाउनु पर्छ । हिलो छ्यापछ्याप र अनावश्यक लालछना लगाउने काम गर्नु हुँदैन् । स्तरिय र सभ्य राजनीति गर्नुपर्छ । मलाई रामचन्द्रले आफ्नो भनेर काखी च्याप्ने र देउवाले अर्को पक्षको भनेर पेल्ने परिपाटी गर्नु हुन्न ।

– तर, अहिलेसम्म त्यस्तै अस्वस्थ्य प्रतिस्पर्धा देखिएको छ नि ? होइन र ?

निर्वाचनका बेला जो जसको प्यानलमा लाग्न सक्छ । तर, निर्वाचन पछाडी सवैलाई समान व्यवहार गर्नुपर्छ । नेतृत्वको गुण भनेको नै त्यही हो । निर्वा्चित भएपछि म सबैको सभापति हुँ भन्ने ब्यक्तिलाई सभापति बनाउनु पर्छ । अनि मात्र लिडरसिप दिन सक्छ । रामचन्द्र जी लुरुलुरु शेरवहादुर जीको घरमा गएर लौ मिलेर जाऊ तपाई प्रधानमन्त्री म सभापति भन्नु भयो, यो पनि त एउटा प्रजातान्त्रिक परिपाटी हो नि त । कतै नजानु भएको भएपनि त हुथ्यो नि ।

– उमेरमा साठी नागेको नेता नै किन पदको लागि यत्रो मारामार गर्छन ?

माओेवादी एमालेको देख्नु भएको छ नी, पार्टी नेतृत्व नछोड्दा सबैले छोडेर गए । कांग्रेसमा यही राम्रो संस्कार छ शीर्ष नेतालाई मान्ने । अब अहिले गगन थापा चर्चित पनि छन् । तर, के उनलाई सभापति मान्न युवाहरु तयार छन त ? हामी तयार छौ त ? गगन भन्दा म पनि के कम छु र । उ त्रिचन्द्रमा संगै पढेको मेरा भाई हो ।

गगनलाई अहिले प्यानल नै पिच्छे तानातान छ । तर, विष्णु धितालले पनि पार्टीमा कम लगानी गरेको छ र ? तर कांग्रेसभित्र एउटा गाउँको मुखियालाई मुखिया नै बनाउने चलन छ । त्यो बाट छुटकारा पाउँदैन । माओवादी एमाले ठूला क्रान्तिकारी कुरा गर्नेले त गर्न केहि गर्न सकेनन् । रामचन्द्र जीसँग भिजन पनि छ, पुरानो नेता पनि । एक पटक सभापति दियो भने देशभर कांग्रेस जाग्छ ।

– रामचन्द्र पौडेल नै किन सभापति ? उहाँसँग पार्टी हाँक्ने के त्यस्तो क्षमता देख्नुहुन्छ ?

उहाँ प्रस्ट वक्ता । भिजन र मिसन पनि छ । वीपीको विचारलाई तर्क संगत ढंङ्गले उहाँले अघि बढाउन सक्नु हुन्छ । उहाँ वीपी र कृष्णप्रसाद भट्टराईको स्कुलिङ र संगतबाट आउनु भएको मान्छे । भ्रष्ट्राचारमा नमुछिएको मान्छे । उहाँको भिजन लागु गर्न एक पटक उहाँलाई पार्टी सभापति बनाउनुपर्छ ।

– यो महाधिवेशनलाई त बाहिरी जगतले पनि हेरिरहेको छ नि ? यो त कांग्रेसको सभापति चुन्ने मात्र होइन नी मुलुककै नेतृत्व दिने पनि हो नि होइन ?

पक्कै पनि अन्तर्राष्ट्रिय जगतले पनि हेरिरहेको छ । विदेशबाट पनि प्रतिनिधि आईरहेका छन् । विदेशी मिडियामा पनि चर्चा छ । कांग्रेसमा भिजन मिसन योजनाको समस्या हो । रामचन्द्र जी सभापति हुनुभयो २० वर्ष्भित्रमा पार्टी कहाँ पुग्छ पुग्छ म विश्वस्त छु । कांग्रेसको एकछत्र हुन्छ ।

– पार्टीमा कमजोर र १७ पटक प्रधानमन्त्रीको निर्वाचन हारेको भनेर बढी नै नकरात्मक टिकाटिप्पणी हुन्छ नि ?

त्यो प्राविधिक पाटो हो । परिस्थिति पनि त्यस्तै भयो । डरलाग्दो पैसाको चलखेल भयो । उहाँ त्यस्तो पैसाको खेलमा नलाग्ने मान्छे । फेरी पैसा पनि कमाएको छैन । अनि कसरी किनवेचको खेलमा उहाँ सफल हुने ? यहाँ त सभासद्को खरिद विक्री हुन्छ । प्रधानमन्त्री बन्नु भन्दा पहिला सुशील कोइराला कहिले पनि मन्त्री बन्नु भएन । रामचन्द्र पौडेल पनि प्रधानमन्त्री बन्न शक्तिको चलखेलमा लाग्नु भएन । उहाँ विदेशी पैसाको चलखेलमा समेत पछि लाग्नु भएन । त्यसैले उहाँले हार्नु भयो ।

– अन्तमा तपाई आफना मतदातासँग कसरी मत माग्नु हुन्छ ?

पार्टी प्रतिनिधि ज्यूहरुलाई मेरा भनाई के हो भने विचारका धनी शीर्ष नेताहरुलाई सँगै राख्दै कांग्रेसभित्र विचारमुखी उमेद्वारलाई मत दिनु पर्छ । जोसँग विचार र कार्यक्रम छ त्यस्तो नेतृत्व छान्नु पर्छ । सुविधा भोगी हैन गाउँगाउँमा गएर कांग्रेसको संगठन बनाउन सक्नु पर्छ । जसले आर्थिक, कार्यक्रम विचार र नीतिलाई अघि बढाउन सक्छ । उनीहरुलाई नै जिताउनु पर्छ । (स्रोतः जनताखबरबाट)





 


प्रतिक्रिया पठाउनुस्
नाम
ईमेल
ठेगाना
प्रतिक्रिया
क्याप्चा   [Reload Image]
 
 

प्रतिक्रियाहरु



अरु समाचारहरु


कम्पनी रजिष्टार कार्यालय दर्ता नम्बर : ८४०५६/०६७/०६८
 
 
Old Baneshwor, Kathmandu, Nepal
+ 9 7 7 - 9 8 5 1 0 4 6 8 8 6
newvisionpoint@gmail.com


        E-mail: akhabartimes@gmail.com

अनलाईन सञ्चारमाध्यम दर्ता प्रमाण-पत्र नं. ३७३/०७३-०७४
न्यू भिजन प्वाइन्ट प्रा.लि.द्वारा सञ्चालित
info@akhabarnepal.com, news@akhabarnepal.com

सुबास मुखिया सुनुवार (SUBAS Kumar Sunuwar)
अध्यक्ष/सम्पादक (President/Editor)
Hemanta Gautam (Managing Director)

Desk Editor Team
Laxmi Kishori Parajuli, Ashok Siwakoti,
Yogendra Chaulagain, Mahesh Kumar Sunuwar, 
Subash Chamling Rai, 
Balkrishna Karmacharya, 
Milan Gurung,
Promise Gurung, Karna Bahadur Ghale,
Sangita Tamang, Rohini Chhetri,
Pawan Kumar Tamang, Mira Tamang Yonjan