आईतवार, ७ माघ, २०७४ (Sun, 21 January, 2018)
समाचार
Dec 15, 2017
प्रतिनिधिसभा र प्रदेशसभाको निर्वाचनमा अधिकांश महिला प्रत्यक्ष तर्फमा विजयी
शुक्रबार, मंसिर २९, २०७४

काठमाडौं : प्रतिनिधिसभा र प्रदेशसभाको निर्वाचनमा प्रमुख राजनीतिक दलले उम्मेदवार बनाउन कन्जुस्यार्इं गरे पनि अधिकांश महिलाले प्रत्यक्षमा विजय हाँसिल गरेका छन् ।

नेपालको संविधानले महिलालाई न्यूनतम रुपमा ३३ प्रतिशत स्थान सुरक्षित गर्नुपर्ने संवैधानिक व्यवस्था गरे पनि दलहरुले त्यसलाई कार्यान्वयन गर्न तयार देखिएनन् ।

हालसम्म घोषित परिणाम अनुसार कमला रोका, पम्फा भुसाल, दुर्गा पौडेल, पवित्रा निरौला र बिना मगर निर्वाचित भएका छन् । निर्वाचित सबै वाम गठबन्धनका साझा उम्मेदवार हुन् । रोका पूर्वी रुकुम, भुसाल ललितपुर ३, पौडेल प्यूठान, निरौला झापा २ र मगर कञ्चनपुर १ बाट निर्वाचित भएका हुन् ।

पहिलो चरण अन्तर्गत प्रतिनिधिसभा सदस्यका लागि हुने चुनावमा प्रत्यक्षतर्फ न्यून महिला उम्मेदवार उठाएका प्रमुख तीन दलले दोस्रो चरणको चुनावमा भने तुलनात्मक रुपमा केही बढी महिला उम्मेदवार उठाएका थिए ।

प्रमुख राजनीतिक दलले कूल १ सय ६५ निर्वाचन क्षेत्रमध्ये १८ जनालाई मात्रै उम्मेदवार बनाएको थियो । प्रत्यक्षतर्फ उम्मेदवारी दिएका मध्ये भुसाल नेकपा (माओवादी केन्द्र)का प्रवक्ता हुन् । मगर र रोका भने सो पार्टीको पोलिटब्यूरो सदस्य हुन् । पौडेल जनमोर्चा नेपालका उपाध्यक्ष तथा झापा एमालेका नेता हुन् ।

पहिलो चरण अन्तर्गत प्रतिनिधिसभा सदस्यका लागि ३७ क्षेत्रमा सम्पन्न भएको निर्वाचनमा नेपाली कांग्रेसले दुई र माओवादी केन्द्रले एक गरी जम्मा तीन जना मात्रै महिला उम्मेदवार बनाएको थियो । यसमध्ये पूर्वी रुकुमबाट माओवादी केन्द्रका उम्मेदवार रोका १० हजार ४ सय ३४ मत प्राप्त गरी विजयी भएका हुन् ।

तर दोस्रो चरण अन्तर्गत १ सय २८ क्षेत्रको चुनावमा प्रमुख तीन दलबाट १५ जना महिलाले उम्मेदवारी मनोनयन दर्ता गराउँदै चुनावी मैदानमा उत्रिएका थिए ।

दोस्रो चरण अन्तर्गत हुने प्रतिनिधिसभा सदस्य चुनावमा नेपाली कांग्रेसबाट सबैभन्दा बढी सात जना, नेकपा (एमाले)बाट पाँच र माओवादी केन्द्रबाट तीन जना महिलाको उम्मेदवारी परेको थियो ।

यसरी नेपाली कांग्रेसबाट उम्मेदवारी दिनेमा तेह्रथुमबाट सीता गुरुङ, महोत्तरी–२ बाट किरण यादव, मकवानपुर–२ बाट महालक्ष्मी (डिना) उपाध्याय, काठमाडौं–३ बाट अम्बिका बस्नेत, दाङ–१ बाट सुशीला चौधरी, कैलाली–१ बाट ईश्वरीदेवी न्यौपाने र कैलाली–५ बाट डा आरजु राणा रहेका थिए । उनीहरु सबै पराजित भएका छन् ।

यसैगरी नेकपा एमालेले झापा–२ बाट पवित्रा खरेल, सुनसरी–३ बाट भगवती चौधरी, उदयपुर–१ बाट मञ्जु चौधरी, स्याङ्जा–२ बाट पद्माकुमारी अर्याल र कैलाली–१ बाट गरिमा शाहलाई उम्मेदवार बनाएको थियो । खरेल विजयी भइसकेका छन् ।

वामगठन्धनकी साझा उम्मेदवार मञ्जु ५ सय ४८ मतान्तरले मात्रै पराजित भए । विजयी डा नारायण खड्काले ३३ हजार १ सय ४२ मत प्राप्त गरे । मञ्जुले ३२ हजार ५ सय ९४ मत प्राप्त गरे ।

सुनसरी ३ बाट वामगठबन्धका उम्मेदवार भगवतीले कांग्रेसका उम्मेदवार विजयकुमार गच्छदारसँग पराजित हुन पुगे ।

यस्तै नेकपा माओवादी केन्द्रले ललितपुर–३ बाट पम्फा भुसाल, पर्सा–४ बाट उर्मिला अर्याल र कञ्चनपुर–१ बाट बिना मगरलाई उम्मेदवार बनाएको थियो । माओवादी केन्द्रका स्थायी समिति सदस्य समेत रहेका अर्याल पराजित भए ।

ती मध्ये कैलाली–१ मा महिला महिला उम्मेदवारबीच नै रोचक प्रतिस्पर्धा हुने ठानिए पनि त्यस्तो हुन सकेन । त्यस क्षेत्रमा कांग्रेसका तर्फबाट ईश्वरीदेवी न्यौपाने र वाम गठबन्धनको तर्फबाट एमालेका गरिमा शाहले उम्मेदवारी दिएका थिए ।

पहिलो चरण अन्तर्गत प्रतिनिधि सभा सदस्यका लागि हुने चुनावमा कांग्रेसले खोटाङबाट सरस्वती बजिमय र बागलुङ–१ बाट चम्पादेवी खड्का तथा माओवादीकी रोका पूर्वी रुकुमबाट उम्मेदवारी दिएका थिए । त्यसमध्ये रोकाले मात्रै विजय प्राप्त गरे ।

समग्रमा प्रतिनिधि सभाको १ सय ६५ सिटका लागि प्रमुख तीन दलबाट पहिलो चरणमा तीन र दोस्रो चरणमा १५ गरी कुल १८ जना मात्रै महिला उम्मेदवारी परेको थियो । जसमा सबैभन्दा बढी कांग्रेसबाट नौ जना र वाम गठबन्धनका एमालेका पाँच र माओवादी केन्द्रका चार जना गरी नौ जनाले उम्मेदवारी दिएका थिए ।

संविधानले संसदमा ३३ प्रतिशत महिला प्रतिनिधित्व अनिवार्य गरेकाले प्रत्यक्षतर्फ महिलाले टिकट कम पाएपछि अब सो संख्या समानुपातिकबाट क्षतिपूर्ति गर्नुपर्ने बाध्यता दललाई आउनेछ ।

ललितपुर–३ बाट विजयी माओवादी केन्द्रकी प्रवक्ता समेत रहेकी पम्फा भुसालले आफूलाई ललितपुरका जनताले विश्वास गरेको र वामगठन्धनलाई चुनौती सहितको जिम्मेवारी दिएको बताउँछन् । यसअघि पनि विसं २०६४ को संविधानसभा चुनावमा आफूले सोही क्षेत्रबाट जितेको र यसपटक वाम गठबन्धन भएका कारण विजयी भएको उल्लेख गरे ।

उनले कांग्रेसका उम्मेदवार मदन अमात्यलाई पराजित गरे । भुसालले २४ हजार ३६ मत प्राप्त गरे । उनका प्रतिस्पर्धी अमात्यले २२ हजार ३ सय २९ मत प्राप्त गरे । जितले आफू सधैँ सो क्षेत्रको विकास निर्माण र जनताको सुख, दुःखमा साथ दिएकाले जिम्मेवारी पनि दिएको बताए ।

महिलाको हक अधिकारको आवाज बुलन्द गर्नुका साथै महिलाले पनि देशको नेतृत्व लिन सक्षम छन् भन्ने देखिएको उनको भनाइ छ ।

मकवानपुर–२ बाट कांग्रेसको उम्मेदवार बनेकी कांग्रेस केन्द्रीय सदस्य महालक्ष्मी उपाध्याय (डीना) पराजित भए । उनी एमालेका उम्मेदवार विरोध खतिवडासँग पराजित भए । खतिवडाले ४४ हजार ७ सय ४४ मत प्राप्त गरेर विजय प्राप्त गर्दा उपाध्यायले ३२ हजार ५ सय ५८ मत प्राप्त गरे ।

कञ्चनपुरबाट बिना मगर निकटतम प्रतिद्वन्द्वीभन्दा दोब्बर मतान्तरले विजयी भए । मगरले ३८ हजार ४ सय ६७ मत ल्याउँदा निकटतम प्रतिद्वन्द्वी कांग्रेसका उम्मेदवार दिवानसिंह विष्टले १९ हजार २ सय १९ मत पाएका निर्वाचन अधिकृतको कार्यालयले जनाएको छ । बिनाले दिवानभन्दा १९ हजार २ य ४८ बढी मत पाएकी हुन् । माओवादी केन्द्रका उम्मेदवार मगर पूर्वप्रधानमन्त्री पुष्पकमल दाहाल प्रचण्डकी बुहारी हुन् ।

निर्वाचन प्रचारप्रसारको समयमा उहाँका पति प्रकाश दाहालको असामयिक निधन भएपछि शोकमा पर्नुभएका मगरले आफूलाई कञ्चनपुरका जनताले जिताएर न्याय गरेको प्रतिक्रिया दिए । उनले सबै मतदातालाई धन्यवाद ज्ञापन गरे ।

निर्वाचन प्रचारका क्रममा सार्वजनिक गरेको प्रतिवद्धतापत्रलाई मुख्य मार्गचित्र मानेर क्षेत्रको विकासमा लाग्नुपर्नेमा वाम गठबन्धनका उम्मेदवार एकमत रहेको नवनिर्वाचित सांसद मगरले बताए । ‘संसद र सिंहदरबारमा सक्रिय भूमिका निर्वाह गरेर आफ्नो क्षेत्रमा बढीभन्दा बढी बजेट र योजना ल्याउने र समयसीमाभित्रै प्रभावकारी कार्यान्वयन गराउने विषय मेरा लागि प्रमुख हुने छन्’ उनले भने ।

‘हालसम्म विकासको अनुभूति गर्न नपाएको दुर्गम क्षेत्रको सेवा गर्ने मेरो संकल्प र विकास भएको देख्ने मतदाताको चाहना मेल खाएकै कारण मैले यति धेरै मत पाएकी हुँ,’ उनले भने ‘यतिधेरै मतदाताको विश्वास र साथ मेरा लागि एकातिर अवसर हो भने अर्कातिर चुनौति पनि । तर, म आफ्नो दक्षता र क्षमताको भरपूर उपयोग गर्दै जनताको अपेक्षा पूरा गर्न निरन्तर खटिने प्रतिवद्धता जाहेर गर्दछु ।’

पूर्वी रुकुमबाट निर्वाचित कमला रोकाले पनि जनताले दिएको अवसरलाई बढी भन्दा बढी सदुपयोग गरेर अगाडि बढ्ने बताए । उता प्यूठानबाट विजयी पौडेलले ४७ हजार ५ सय १५ मत प्राप्त गरे । उनका निकटतम् प्रतिस्पर्धी डा गोविन्दराज पोखरेलले ३१ हजार २ सय ८६ मत प्राप्त गरे ।

नवनिर्वाचित सांसद पौडेलले आफूलाई विश्वास गरेर विजयी गराउने सम्पूर्ण मतदाता, वामगठबन्धन तथा प्यूठानका सम्पूर्ण जनताको हितमा सधै प्रतिवद्ध भएर काम गर्ने बताए ।


 


प्रतिक्रिया पठाउनुस्
नाम
ईमेल
ठेगाना
प्रतिक्रिया
क्याप्चा   [Reload Image]
 
 

प्रतिक्रियाहरु



अरु समाचारहरु


कम्पनी रजिष्टार कार्यालय दर्ता नम्बर : ८४०५६/०६७/०६८
 
 
Old Baneshwor, Kathmandu, Nepal
+ 9 7 7 - 9 8 5 1 0 4 6 8 8 6
newvisionpoint@gmail.com

        E-mail:
 akhabartimes@gmail.com


अनलाईन सञ्चारमाध्यम दर्ता प्रमाण-पत्र नं. ३७३/०७३-०७४
न्यू भिजन प्वाइन्ट प्रा.लि.द्वारा सञ्चालित
info@akhabarnepal.com
news@akhabarnepal.com

सुबास मुखिया सुनुवार (SUBAS Kumar Sunuwar)
अध्यक्ष/सम्पादक (President/Editor)
Editor Team
Mahesh Kumar Sunuwar, Hemanta Gautam, 
Ashok Siwakoti, Yogendra Chaulagain,
Ranika Rai Sunuwar, Laxmi Kishori Parajuli, 
Bahudal Kaji Rai, Dilman Gurung,
Janga Bahadur Bomjan, Nir Bahadur Tamang
Sangam Gurung, Manish Bahadur Tamang