काठमाडौं : २८ गते दुई दिने नेपाल भ्रमण शुरु गर्ने भारतीय समकक्षी नरेन्द्र मोदीलाई प्रधानमन्त्री केपी शर्मा ओलीले जनकपुरमा स्वागत गर्ने हुनु भएको छ ।

विहारको पटनाबाट हेलिकप्टरमा २८ गते बिहान नौ बजे जनकपुर आउने मोदीलाई जनकपुरमा प्रधानमन्त्री ओलीले स्वागत गर्ने कार्यक्रम रहेको परराष्ट्र मन्त्रालयले जानकारी दिएको छ ।

जानकी मन्दिरमा दुबै प्रधानमन्त्रीले पूजा अर्चना गरिसकेपछि ओली काठमाडौं फर्कनुहुनेछ भने भारतीय प्रधानमन्त्री मोदी बाह्रबिघा मैदानमा आयोजना हुने नागरिक अभिनन्दनमा सहभागी हुने कार्यक्रम छ ।

मोदीले स्थानीय जनसमुदायलाई सम्बोधन गर्ने कार्यक्रम पनि रहेको मन्त्रालयले जानकारी दिएको छ । सोही दिन मोदीलाई काठमाडौंको टुँडिखेलमा गार्ड अफ अनर दिइनेछ भने दुई प्रधानमन्त्रीबीच भेटवार्ता समेत हुनेछ । भेटपछि मोदी पोखरामा बास बस्न जाने कार्यक्रम छ ।

भ्रमणको दास्रो दिन बिहान मुक्तिनाथको दर्शनपछि मोदी पुन: काठमाडौं आउने र राष्ट्रपति विद्यादेवी भण्डारी र उपराष्ट्रपति नन्दबहादुर पुनसँग शिष्टाचार भेट गर्ने मन्त्रालयले जनाएको छ ।

दुई दिने भ्रमणकै क्रममा मोदीलाई काठमाडौं महानगरपालिकाले समेत राष्ट्रिय सभागृहमा नागरिक अभिनन्दन गर्ने कार्यक्रम राखेको छ । साथै ९ सय मेगावाटको अरुण तेस्रो जलविद्युत परियोजनाको पनि रिमोट बटममार्फत काठ्माण्डौबाट संयुक्त उद्घाटन गर्ने कार्यक्रम छ ।

मोदी आउने दिन बैशाख २८ गते प्रदेश नं. २ को प्रादेशिक सरकारले सार्वजनिक विदा दिने निर्णय गरेको छ । २९ गते मुक्तिनाथ पुग्ने मोदीको कार्यक्रमलाई मध्यनजर गर्दै बैशाख २७ गतेदेखि तीन दिन अन्नपूर्ण पदमार्ग पनि बन्द गरिने भएको छ ।

- बालकृष्ण कर्मचार्य