काठमाडौं : सम्पति शुद्धीकरण बिभागले सुन तस्करी प्रकरणमा सलंग्न आरोपीहरुको सम्पति छानविन सुरु गरेको छ । पहिलो चरणमा मुख्य नाइके भनिएका चुडामणी उप्रेती, राप्रपा प्रजातान्त्रिकका नेता भुजुङ गरुङ र छिरिङ वङ्गेल गुरुङको सम्पति छानबिन शुरु गरेको छ ।

३८ क्वीन्टल सुन तस्करी प्रकरण र सनम शाक्य हत्या अभियोगमा पुर्पक्षका लागी जेल चलान भएका अभियुक्तलाई अकुत सम्पत्ति आर्जन गरेको आरोपमा सम्पत्ति शुद्धीकरण बिभागले अनुसन्धान अघि बढाएको हो ।

मुख्य आरोपी गोरे भनिने चुडामणि उप्रेती, छिरिङ वङगेल गुरुङ र अर्का आरोपी भुजुङ गुरुङलाई सम्पति शुद्धीकरण बिभागले प्रारम्भिक बयान लिएको हो । सोमबार बिहान मोरङ जिल्ला कारगारबाट उनीहरुलाई काठमाडौं ल्याइएको र बिभागले गोरे र उनको टोलीसँग बयान लिएको बताइएको छ ।

तिनै जनालाई सम्पत्ति शुद्धीकरण सम्बन्धि मुद्धा चलाउने र तस्करीमा संलग्न व्यक्तिको बारेमा छानविन समितिले थप अनुसन्धान गर्ने गरी जिल्ला अदालत मोरङले काठमाडौं ल्याउन अनुमति दिएको हो । उनीहरु भरिया मात्र हुन सक्ने हुनाले सुन तस्करीको मुख्य तस्कर पत्ता लगाउन सहयोग पुग्ने सम्पती शुद्धीकरण बिभागले जनाएको छ ।

सुन तस्करी र सनम शाक्य हत्या प्रकरणमा छानविन गर्न गठित समितिले आरोपीहरुको सम्पत्ति छानविन गर्न सुझाव दिएपछि बिभागले प्रक्रिया अगाडी बढाएको हो । सुनको वास्तविक मालिक को हुन् भन्ने खुलिनसकेको अवस्थामा आफुले पाएका सुचनाका आधारमा अनुसन्धान गर्दै जाने सम्पत्ति शुद्धीकरण बिभागका निर्देशक बिनोद लामिछनानेले बताए ।

बिभागको प्रारम्भिक बयान पश्चात आरोपीहरुलाई केन्द्रिय कारगारमा राखिएको छ । तिनै जना आरोपीलाई बिशेष सुरक्षा सहित बेग्लाबेग्लै स्थानमा राखिएको केन्द्रिय कारगार प्रशासनले जनाएको छ ।